حلت الفنانة دينا الشربيني، ضيفة في برنامج «سهرانين» مع النجم أمير كرارة، المذاع على قناة ON.
وعن بدايتها مع التمثيل في الطفولة قالت دينا الشربيني: «كنت بحفظ مشاهد من التليفزيون والمسرحيات وأدخل الحمام أمثل قدام المرايا عشان ماحدش يدخل عليا لأني ماكنتش عاوزة حد يعرف إني بحب التمثيل، ولو قفلت الأوضة هيخبطوا وهاضطر أفتح ويعرفوا».
وتابعت دينا الشربيني: «كنت بحب كرة القدم أوي وكنت بلعب في النادي وأنا صغيرة بس ماكنتش شاطرة، فكنت بضرب البنات وفي مرة كسرت رجل بنت بس بدون قصد طبعا».
وأضافت دينا الشربيني: «وأنا طفلة كنت متعبة أوي لوالدي ووالدتي، يعني مثلا كنت بحب كوبري 6 أكتوبر أوي مش عارفة ليه، فكان والدي يضطر يطلعني عشان لما بطلع في أول الكوبري بنام وآخر الكوبري لما ينزل أصحى وأقوله مشوفتش الكوبري، وكان لما يدخل ينيمني ويعمل إنه ساحر، كان هو ينام وأنا أخرج لوالدتي وأقولها متعمليش صوت عشان بابا نام».