في أول تعليق لها على الشائعات المتداولة مؤخرًا، نفت الفنانة أنغام أي صلة لها بالحملة التي وُجّهت ضد الفنانة شيرين عبدالوهاب بعد حفلها في مهرجان “موازين”، مؤكدة أنها كانت تمر بوعكة صحية حادة نُقلت على إثرها إلى المستشفى منذ يوم السبت الماضي.
وخلال مداخلة هاتفية مع الإعلامية لميس الحديدي في برنامج “كلمة أخيرة” عبر قناة ON، كشفت أنغام أنها تعاني من أزمة صحية مفاجئة منذ الأربعاء، وقالت: “أنا بالفعل في المستشفى من يوم السبت، بعد ما تعبت فجأة بشكل شديد. تم نقلي للعلاج، ومكنتش حابة أقول لحد لأني كنت مرهقة ومش قادرة أستقبل حد أو أشرح وضعي. قررت أفضل ساكتة علشان أرتاح”.
وأضافت: “كنت متخيلة إني هخرج في نفس اليوم بعد فحوصات بسيطة ومسكنات، لكن تبين إن الأمر محتاج وقت واستشارات، والحمد لله على كل حال”.
وعن الحملة التي وُجهت ضدها، أكدت أنغام أنها فوجئت بما يُقال عنها، قائلة:”أنا مش من النوع اللي بيرد على الشائعات أو يدخل في مهاترات، وده أسلوبي من زمان سواء في حياتي أو شغلي. عمري ما كنت بتاعة مشاكل ولا بدّعي المثالية، أنا إنسانة طبيعية بحب شغلي وبحترم جمهوري، حتى اللي مش بيحبني بحترمه”.
واعتبرت أن الاتهامات التي طالتها في هذه الأزمة خرجت عن حدود النقد لتصل إلى التجريح: “اللي حصل المرة دي كان فوق الاحتمال.. كنت في المستشفى، وفوجئت بشتائم وتلميحات جارحة من ناس مسؤولين ومفترض إنهم زملاء. في مواقع كتبت اسمي بشكل مباشر، والفانز بتوع مطربة زميلة بيتكلموا كأنهم عارفين حاجة، وأنا مالي؟! هو أنا ليّا علاقة بالمشكلة اللي حصلت؟!”.
وتابعت بغضب: “حتى لو مكنتش في المستشفى، برضه مالي؟! أنا تحملت أربع سنين من التلميحات، وسكت. ماردتش ولا مرة. كنت بزعل لوحدي وبلتمس أعذار. لكن إن حد يطلعني كأني وراء حملة أو مؤامرة، ده افتراء وظلم كبير”.
وأشارت إلى أنها لا توجه اتهامًا مباشرًا لأي شخص، لكنها تستنكر تصرفات بعض المحيطين، قائلة: “أنا مش باتهمها شخصيًا، لكن في ناس حواليها بيقولوا ويوجهوا الناس ضدي. اللي بيحاولوا يقربوا منها بشكل غلط يقولوا اللي عايزينه، بس ميدخلوش اسمي في الموضوع”.
كما حذّرت من أنها لن تصمت أمام أي تجاوزات مستقبلية: “أنا فعلاً تعبت. ومش هسكت لأي حد هيتطاول عليا. وسبق ورفعت قضية على شاب كتب عني في تويتر واتحبس، وأي شخص هيكرر نفس الغلط، هاخد إجراء قانوني”.
وبصوت مخنوق بالدموع، ناشدت أنغام الجمهور قائلة: “كفاية ظلم.. كفاية كره.. كفاية حقد. أنا مش طالبة غير إنكم تسيبوني في حالي. محدش له دعوة بنيتي، ربنا هو اللي بيحاسبني”.
وفي ختام حديثها، وجّهت رسالة مباشرة لمحبيها: “أنا بطلب من جمهوري يحبني علشاني أنا، مش علشان أبقى أحسن من حد. ماتقارنونيش بحد، ولا تقارنوا حد بيا حتى لو في صالحي. المقارنات مش بترفعني، بالعكس بتوجعني. ولو بتحبوني بجد، ادعموني بالطريقة الصح، مش بإثارة مشاكل أو تجريح الآخرين”.
اقرأ أيضا:
أنغام تحيي حفلين في السعودية احتفالًا بعيد الأضحى 2025
أنغام تحيي «ليلة صوت مصر» في الكويت
