تحدثت الفنانة منة فضالي، عن طفولتها وكيف عانت بسبب عدم وجود والدها في حياتها وتركها عندما كانت مولودة ولديها شهرين فقط.
واستكملت منة فضالي خلال حديثها مع الإعلامية أميرة بدر في برنامج Vip المذاع على شاشة فضائية «هي»: «طبعا كان بيأثر في بداية طفولتي إن والدي مش موجود ولكن ماما كانت مالية الفراغ وشغلالي دماغي ومش بقعد في البيت لوحدي، ولما كنت بسأل عن بابا كانت ماما بتقولي: مسافر.. شغله برة مش موجود».
وتابعت منة فضالي: عارفة شكله وبشوف صوره.. كنت بشوف زمايلي في المدرسة بيبقى معاهم باباهم ومامتهم وأنا معنديش بابا وكان بيضايقني الموضوع ده جدًا.. ولكن اختلف الموضوع لما كبرت بقيت أشوف الدنيا بشكل تاني.
وأضافت منة فضالي: الموضوع صعب جدًا بالنسبة للبنت لأن البنت بتحتاح لسند ولحضن يحسسها بالأمان ولما يبقى عندها مشكلة في المدرسة ترجع لباباها مش مامتها كنت دايمًا بلجأ لجدي وهو كان مدلعني أوي وأنا صغيرة حتى لما كنت بتعب بنده لماما وأقولها: عايزة أشوف بابا طبيعي كأي واحدة صغيرة في مدرسة عايزة باباها.
وقالت منة فضالي: كنت بتكلم مع بابا وأنا صغيرة بس كل فين وفين وكان بيقولي مشغول ومسافر وعندي شغل مكنتش هفهم الكلام ده وأنا صغيرة بس كنت بتضايق وأنا كل شوية بسأله هتيجي امتى؟ وأنا مكنتش أعرف إنهم منفصلين، سابني وأنا عندي شهرين أو تلاتة أنا نفسي أعرف ليه؟ بس خلاص متأخر دلوقتي.
وتابعت منة فضالي: لما كبرت وبدأت أشتغل عرفت إن ماما اتطلقت وعرفت بعد وقت طويل هي كانت أول زوجة له وقعدوا مع بعض 12 أو 13 سنة أنا جيت بعد معاناة طويلة لماما في الخلفة.. وكانت بتسقط كتير جدًا.. وتعبت عشان تجيبني وجالها حمى نفاس وكانت هتموت وحاجات كتير، أمي مرتبطة بيا زيادة عن اللزوم وأنا كمان. .. ماما وبابا كانوا بيحبوا بعض جدًا ولحد دلوقتي فيه بينهم احترام ووالدي من عيلة كبيرة جدًا مثقف ومتعلم تعليم عالي وطباخ كويس جدًا.
واختتمت منة فضالي حديثها الأول: كان الموضوع بالنسبة لي كره عشان كان موجود ومش موجود ولكني كنت شايفة إنه مش موجود بإرادته وإنه كان موجود وهو اللي مش عايز يكون موجود كانت تعباني نفسيًا.
اقرأ أيضا:
منة فضالي تكشف عن شخصيتها في «سره الباتع»
منة فضالي تكشف عن تعرضها لوعكة صحية
